Кырсык чалган басмакананын жанынан келген адамдар гүл коюп, кыз-келиндердин жакындарына көңүл айтып жатышат.
БИШКЕК, 28-авг. — Sputnik. Москва шаарында өрттөн улам каза болгондорду эскерүү иш-чарасы өтүп жатканын Кыргызстандын Россиядагы элчилигинин маалымат катчысы Гүлбарчын Байымбетова.
Эскерте кетсек, ишемби күнү шаардын түндүк-чыгышында жайгашкан "Печатный экспресс" басмаканасында өрт чыгып, андан Кыргызстандын 14 жараны каза болду.
Байымбетованын айтымында, эскерүү иш-чарасы басмакананын эшигинин алдында өтүп жатат. Ал жерде учурда элчиликтин кызматкерлери, диаспоралардын активисттери жана Москвада жашаган кыргыздар бар. Келгендер гүл коюп, маркумдардын жакындары менен туугандарына көңүл айтышууда.
"100гө чукул киши чогулду. Элчи Болот Отунбаев менен диаспора жетекчилери чыгып сөз сүйлөштү. Учурда Россиянын ӨКМи жана башка органдар менен маркумдардын сөөгүн Кыргызстанда жеткирүү боюнча сүйлөшүүлөр жүрүп жатат", — деди Байымбетова.
Маалымат катчы эртең, 29-август күнү Москвага президенттин тапшырмасы менен бөлүнгөн учак учуп келерин белгиледи. Ал кырсыктан көз жумган кыз-келиндердин сөөгүн Кыргызстанга алып келмекчи.
