БИШКЕК, 27-авг. — Sputnik. Алтуфьевское шоссесинде жайгашкан басмаканада чыккан өрттөн түнкү нөөмөттө иштеген кыргызстандыктар каза болду. Бул туурасында Sputnik Өзбекстан агенттигинин кабарчысы Анастасия Александрова жеринен билдирди.
Кабарчынын айтымында, өрт чыкканда имараттын ичинде 16-20 чакты киши калган. Азырынча алардын тагдыры эч кимге белгисиз. Айланасында тургандар жардам берип чуркап жүрүштү.
"Өрт кызматы келгенде 30-40 мүнөт эч нерсе кылган жок. Айланасындагы кыргызстандыктар чырылдап чуркап жъръштъ. Бир бала өрт өчүрүүчүнүн каскасын, кийимин сурап кийип алып, досу менен кирип кетти. Балдар 2-кабаттан бир аялды имараттын чатырына алып чыгышты. Ал жерден тик учак алып чыгып кетти. Бир кишинин 1995-жыл туулган аялы ичинде калыптыр. Ыйлап, ары-бери басып жүрөт", — деди кабарчы.
Эске сала кетсек, Москва шаарынын Алтуфьевское шоссесинде жайгашкан басмаканада өрт чыккан. Алдын ала айтылган маалыматтарда каза болгон 16 адам КМШ өлкөлөрүнүн жарандары экендиги айтылган.
