БИШКЕК, 28-авг. — Sputnik. Кыргыз өкмөтү Москва шаарында курман болгондордун жакындарына жана туугандарына көмөк көрсөтүү боюнча штаб түзгөнүн анын маалымат кызматы билдирди.
Эскерте кетсек, кечээ, 27-август күнү Москва шаарынын Алтуфьевское шоссесинде жайгашкан басмаканада өрт чыккан. Андан Кыргызстандын 14 жараны каза болуп үчөө жабыркаган.
Президент Алмазбек Атамбаевдин тапшырмасы менен курман болгондордун сөөгүн Кыргызстанга алып келүү үчүн атайы борт бөлүнгөн.
Кудайбердиева башында турган жумушчу топ бүгүн, 28-августта, Москва шаарына учуп кетет. Топтун курамына курман болгондордун жакындарына жана туугандарына көмөк көрсөтүү үчүн өзгөчө кырдаалдар министри Кубатбек Боронов, Саламаттык сактоо министрлигинин жана Мамлекеттик миграция кызматынын өкүлдөрү, дарыгерлер, психологдор киргизилген.
Курман болгондордун сөөгүн алып келүү, жерге берүүгө байланыштуу чыгымдарга тийиштүү бардык маселелер өкмөт тарабынан чечилет.
Кеңешмеде тышкы иштер министри Эрлан Абдылдаев каза болгондордун сөөгүн таануу боюнча иштер жыйынтыкталганын билдирди. ИИМ башчысы Кашкар Жунушалиевдин маалыматына ылайык, кырсыктан 14 адам курман болуп, үч адам жабыркаган.
