Үзүлгөн үмүт. "Аттиң, андан көрө лицензияны албай эле койсо болмок, булар Бразилияга эс алганы эле барган го"… Айтор ушул сыяктуу сөздөр жамгырдай эле жаады. Анткени көпчүлүк үмүт артып, бир кезде лицензиясын алып койсо бүтүндөй кыргыз эли кайгырып, лицензиясын кайрып бергенде төбөбүз көккө жеткен Жанарбек Кенжеев Олимпиадада бир дагы упай албай жеңилип калды. Ух, биздин кесиптешибиз Айида Батырбекованын ушунчалык ачуусу келди дейсиңер… Ачуусу келгендиктен үйүнө жөө кетип калды.
Багы жокко дагы жок. Жанарбектин үмүткө суу сепкени аз келгенсип, дагы бир кыргыз балбаны Мурат Рамонов биринчи эле кармашында алдырып жиберди. Ушул балбанга жакшы эле жан тартайын дедик, чын… бирок өзү каккан казыктай туруп берди. Эки балбандын кулагы катуу эле кызарды го.
Макул эми, спортто бири жеңсе, экинчиси утулат. Буюрса уучубуз куру эмес. Алдыда биз күткөн балбан кыз Айсулуу Тыныбекова бар. Ага чейин болсо футбол боюнча Кыргызстан — Казакстан жолдоштук беттешине арналып даярдалган роликти сунуштайм.
Үнүбүз кудайга жеткенде. Эс тартып, Кыргызстанда Ысык-Көл деген кереметтүү көл бар экенин билгенден бери эле андагы таштанды маселеси чечилбей келет. Ал эми кечээ, Тоң районунун акимине эскертүү берилди. Бул эми башка акимдерге да чоң сабак болот деген үмүттөбүз.
Багы ачылбаган Ысык-Көл мейманканасы. Кыргызстандын өкмөтү бир нече жылдан бери иштебей турган Ысык-Көл мейманкана комплексин реконструкциялоону пландап жаткандыгы тууралуу Инвестицияны өнүктүрүү агенттигинин сайтына жарыяланды.
Баса, окумуштуулардын айтымында, 2084-жылы жайкы Олимпиада оюндары Бишкек шаарында өтүшү мүмкүн. Чын, күлбөңүз. Илимпоздордун айтымында, 70 жылдын ар жак-бер жагында дүйнөдө жайкы оюндарды өткөрө турган 8 эле шаар калат имиш. Ошонун арасында Кудай жалгап Бишкек да бар экен.
Ал эми бүгүн, ысыктын илеби кайтып, өлкө аймагында жаан себелейт.
Валюта баасы. Бүгүн бир доллар 68.78 сом деп бааланды.
Мунай баасы. Бишкекте Аи-95 үлгүсүндөгү бензин 39 сом болуп кымбаттады. Ал эми Аи-92 үлгүсүндөгү май 36 сом, ал эми дизель майы 32 сомду түздү.
Соңку сөз ордуна. Өзгөрүүнү өзүңдөн башта.
Дагы деле Олимпиададан медаль үмүт кылган Исмаил Мамытов.
