БИШКЕК, 10-авг. — Sputnik. Энесин беш жашар баласынын көзүнчө зордуктады делген таксисттин депутат тууганы бар болушу мүмкүн. Бул тууралуу Sputnik Кыргызстан агенттигине жабырлануучунун адвокаты Данияр Жолдошев билдирди.
Үстүбүздөгү жылдын 29-июль күнү Чүй облусунун 33 жаштагы тургуну милицияга арыз менен кайрылып, аны белгисиз бирөө зордуктап салганын айткан. Аталган кылмышка шектүү катары ошол эле күнү таксист кармалган. Ал эми сот кылмышка шектүүнү бир ай камакка алуу чечимин чыгарган.
"Биз Тоң райондук ички иштер башкармалыгына буга чейин аталган таксисттин үстүнөн үч жолу арыз түшкөнү тууралуу маалымат алдык. Бирок үч ирет тең иш сотко жеткен эмес. Кылмышка шектүүнүн Жогорку Кеңеште депутат тууганы бар деген маалымат уктук", — деди Жолдошев.
Жолдошев таксистти катаал жазага тартууну сунуштоого ниеттенип жатканын айттты. Ал эми ага карата Кылмыш жаза кодексинин 129-беренси (зордуктоо) боюнча кылмыш иши козголгон. Аталган берене боюнча айыпталуучу 5 жылдан 8 жылга чейин эркинен ажыратылат.
Жактоочу тергөөчүнүн берген маалыматына таянуу менен шектүүнүн эки баласы бар экенин, ал беш убак намаз окуй тургандыгын кошумчалады.
"Жабырлануучунун айтуусу боюнча таксист ага күч колдонуу менен сыра ичирген", — деди ал.
Адвокат аталган иш боюнча соттук медициналык-экспертиза дайындалганын кошумчалады.
Учурда аталган иш Каракол облустук сотунда каралып жатат.
