БИШКЕК, 4-авг. — Sputnik. Беш жашар баланын көзүнчө энесин зордуктаган деген шек менен таксист кармалгандыгын Ысык-Көл райондук ички иштер башкармалыгы билдирди.
Үстүбүздөгү жылдын 29-июль күнү Чүй облусунун 33 жаштагы тургуну милицияга арыз менен кайрылып, аны белгисиз бирөө зордуктап салганын айткан.
"Жабырлануучунун айтымында, ал Балыкчыдан Бишкекке келүү үчүн такси токтотуп, жолго чыккан. Айдоочу Балыкчыдан чыгаары менен тоо тарапка айдап барып, баласынын көзүнчө зордуктап салган", — деп айтылат маалыматта.
Эртеси күнү эле Тоң райондук ички иштер башкармалыгы аталган кылмышка шектүү катары 30 жаштагы таксистти кармап, аны жабырлануучу дароо тааныган.
Анткен менен таксист эч кандай зордуктабаганын, аял экөө чогуу спирт ичимдигин ичишкенин билдирген.
"Кармалган жаран жолдо кафеге токтоп, чогуу тамактанганын, андан соң келиндин макулдугу менен жыныстык катнашка барганын айтты", — деп айтылат маалыматта.
Ал ортодо райондук сот кылмышка шектүү жаранды бир айга камоо чечимин чыгарды.
Эске сала кетсек, аталган окуяны ИИМ башчысы Кашкар Жунушалиев өз көзөмөлүнө алган. Учурда тергөө амалдары улантылууда.
