"Ата керээзи" тасмасы Канадага аттанат. Канаданын Монреаль шаарында өтө турган эл аралык кинофестивалга Кыргызстандан Бакыт Мукул менен Дастан Жапар уулунун "Ата керээзи" тасмасы катышмай болду. Фильм кыргыз элинин маданий мурасын сактоо жана жайылтууга, ата салтын даңазалоого багытталган. Быйыл аталган фестиваль 40-ирет өтөт экен.
Мен бала кезде үйдүн чатырынан кулап кетип, бийиктиктен катуу коркуп калгам. Ал эми америкалык Люк Айкинс эч кандай парашюту жок эле 8 миң метр жерден секирип жибериптир. Окуя кандай болгонун бул жактан көрүңүз. Баса, чатырдын кулаган менин бутум сынса, Айкинстин бир тал чачы түшпөптүр эй…
Айкинстин эрдигине ооз ачып отурсам, унаасы жарылган прокурор өзүнө келип, сүйлөгөнгө жарап калыптыр. Эмне дейбиз, батыраак сакайып кетиңиз.
Атамбаев премьер-министр болбойт. Президент Алмазбек Атамбаевдин Конституцияга өзгөртүү киргизилгенден кийин премьер-министр болуу ниетинде жок. Бул тууралуу журналисттерге Жогорку Кеңештин төрагасы Чыныбай Турсунбеков билдирди. Мындан тышкары, төрага референдумдан кийин парламент таратылбай тургандыгын кошумчалады.
Эгерде саясат көңүлүңүзгө көк таштай эле тийген болсо, сүйүктүү ырчыңыз Самара Каримованын алгачкы сүйүүсү, балдай таттуу балалыгы тууралуу окуп, кеңири маалымат алсаңыз болот.
Өлбөс өмүр: Тайлак баатырдын 220 жылдыгы белгиленди. Тарых барагында аты алтын тамгалар менен жазылып калган Тайлак баатыр бир тууганы Атантай менен кыргыз элинин эркиндиги, көз карандысыздыгы үчүн канын азык, каруусун казык кылып келген инсандардан. Соң-Көлдө өткөн иш-чаранын сүрөттөрүн көргүңүз келсе, бул жактан күтөбүз.
Валюта баасы. Бүгүн сомдун баасы долларга карата орто эсеп менен 67.20 (сатып алуу) жана 67.97 (сатуу) сомду түздү.
Мунай баасы. Бишкекте Аи-95 үлгүсүндөгү бензин 38 сом, Аи-92 үлгүсүндөгү май 35 сом, ал эми дизель майы 30 сом 50 тыйындан сатылууда.
Соңку сөз ордуна. Күндүн күлкүсү жан дүйнөңүздү жылытсын.
Эки бетиңизден эки жолу өөп Исмаил Мамытов.
