БИШКЕК, 26-июл. — Sputnik. Премьер-министр Сооронбай Жээнбеков Мамлекеттик салык кызматынын төрагасы Замирбек Осмоновду кабыл алып, бул кызматтын жыл башынан бери жасаган иши тууралуу маалымат укту. Бул тууралуу өкмөттүн басма сөз кызматы билдирди.
Осмоновдун маалыматына ылайык, биринчи жарым жылдыкта салык төлөмдөрүн чогултуу планы 95 пайызга аткарылган.
"Июнь айында пландын аткарылышы – 112 пайызды, же 650 миллион сомду түздү. Мунун эсебинен биз мурдагы жоготууларды кыскартып, натыйжада жарым жылдыктын планын 95 пайызга аткардык. Өткөн жылга салыштырмалуу бул көрсөткүч 9 миллиард сомго жогорулаган", — деп белгиледи Осмонов.
Жээнбеков экономикалык өсүш салыктык төлөмдөрдүн көлөмүнөн түздөн-түз көз каранды экенин айтып, мамлекеттик бюджеттин киреше бөлүгүн жүз пайыз аткарууда салык чогултууну толук камсыз кылуу тапшырмасын берди.
