БИШКЕК, 19-июл. — Sputnik. Россиянын Новосибирск шаарынын жанындагы "Гусиный Брод" кыштагында кыргыздын кадимки эле кымызканасы ачылган. Бул тууралуу Sputnik Кыргызстан агенттигине "Атанур" кымызканасынын жетекчиси Нуралы Муратбеков билдирди.
Анын айтымында кымызкана үстүбүздөгү жылдын май айында ачылган.
"Учурда биздин эс алуу борборубузда кымыз баш болгон кыргыздын улуттук тамак-аштары даядалат. Мындан сырткары ат менен сейилдөө, балык уулоо кызматтары көрсөтүлөт. Ошондой эле воллейбол, футбол аянтчаларыбыз да бар", — дейт Муратбеков.
Ал кымызкана экинчи уулунун атынан коюлганын кошумчалады.
"Борборду үй-бүлөбүз менен иштетебиз. Бээлерди иним саап, келинчегим кымыз жасайт. Мен болсо эс алып келгендерге кой союп берип, балык кармаганга жардам берем. Ал эми мектепте окуган эки уулум конокторду ат менен сейилдетет", — деди борбордун ээси.
Муратбеков күнүнө 40 литр кымыз жасалаарын айтты.
Кымызкананын ээси жергиликтүү башкаруу органдарынан уруксат алганын жана салык төлөп тураарын кошумчалады.
Мындан сырткары Муратбеков күз келээри менен аталган аймакта ат оюндарын уюштурууга ниеттенип жатканын белгиледи.
Бээнин сүтүн жана кымызды туура ичүү боюнча маалыматты Sputnik инфографикасынан көрүңүздөр>>
