Поэзия дүйнөсүнө салмактуу салымын кошкон Кыргыз Эл акыны, Токтогул атындагы мамлекеттик сыйлыктын лауреаты Сүйүнбай Эралиев 1921-жылдын 15-октябрында Талас облусунун Үч-Эмчек айлында жарыкка келген.
Саяпкердин уулу. Атасы Эралы күлүк таптап, чоң мелдештерге байгеге чыгарып, ошол чөлкөмдө бир топ кадыр-барктуу адам болгон.
Таятынын тарбиясын алган. Акын таланттуу комузчу таятасы Орозбай молдонун колунда өскөн. Эралиевдин айтымында, атактуу комузчу Атай Огонбаев анын таятасынан эки жылдай сабак алган.
Согуш ааламатына катышкан. Улуу Ата Мекендик согушка барып, 1944-жылы жарадар болуп келген.
Алгачкы жыйнак. Биринчи поэтикалык жыйнагы "Биринчи жаңырык" деген ат менен 1949-жылы жарык көргөн.
"Жылдыздарга саякат" — мыкты чыгарма. Чыгармалары көп тилдерге которулуп, "Жылдыздарга саякат" поэмасы 1967-жылы Югославияда басылып чыккан.
Акындын 60ка жакын китеби жарык көргөн. Акындын кыргыз тилинде жалпысынан 36, орус тилинде 20, башка тилдерде 4 китеби жарык көргөн.
Наам, сыйлыктары. 1974-жылы "Кыргыз Эл акыны", 1986-жылы "Кыштак кечтери" аттуу китеби үчүн Кыргыз ССРинин Токтогул атындагы Мамлекеттик сыйлыгын алган. "Элдердин достугу" ордени; Улуу Ата Мекендик согуштун биринчи даражадагы ордени; III жана I даражадагы Манас ордендери, Ардак грамоталар жана көптөгөн медалдар менен сыйланган. 2006-жылы "Кыргыз Республикасынын Баатыры" ардак наамы берилген.
