БИШКЕК, 16-июл. — Sputnik. Президент Алмазбек Атамбаев Түркиянын мыйзамдуу бийлигин колдоду деп билдирди мамлекет башчынын маалымат кызматы.
Тышкы иштер министри Эрлан Абдылдаев президентке Түркиядагы абалга байланыштуу ал жактын аймагындагы кыргызстандык жарандардын коопсуздугу жана бул боюнча кабыл алынып жаткан чаралар тууралуу маалымат берди. Анкара, Стамбул жана Бишкек шаарларында атайын байланыш телефондору ачылгандыгын кабарлады.
Атамбаев Кыргызстан Түркиянын мыйзамдуу шайланган бийлик органын колдой тургандыгын билдирди. "Кыргызстан демократиялуу жол менен эркин шайлоолор аркылуу шайланган өлкө жетекчисин бийликтен кулатуу үчүн аскердик күчтү пайдалануу орунсуз деп эсептээрин айтты", — деп билдирилген таратылган маалыматта.
Атамбаев түркия элинин акылмандуулугуна ишенээрин айтып, алар конституциялык түзүмгө кооптуулук жараткан учурларга каршы тура аларын айтты.
"Түркия Кыргызстандын стратегиялык өнөктөшү жана эки элди тарыхый тамыр, боордоштук байланыштырып турат. Биз түркия элинин айкылмандуулугуна ишенебиз. Алар конституциялык түзүмгө кооптуулук жараткан учурларга каршы тура алат жана адам укуктары менен эркиндигин сыйлат. Кыргызстан эли Түркиянын мыйзамдуу бийлигин колдойт жана өлкөдө тынчтыкты, мыйзамдуулукту, тартипти тезирээк орнотууга чакырат",— деп айткан Атамбаев.
