БИШКЕК, 14-июл. — Sputnik. Германиянын канцлери Ангела Меркель Кыргызстанга иш сапары менен келгенде өлкө аймагында жер титиреди.
Албетте, жер силкингенин Бишкектен Меркель айым туйган деле жок. Ал өлкөнүн түштүгүндө Бор-Дөбө, Нура айылдарында сезилди.
Sputnik Кыргызстан агенттиги башка мамлекеттин жетекчилери келгенде өлкөдө кандай нерселер болгонун эстеп көрдү.
Медведев жана Фучиктеги жарылуу. 2016-жылы 6-июнда Кыргызстанга Россиянын премьер-министри Дмитрий Медведев келген. Бул күн жолдордун тосулушу жана бир катар мамлекеттер аралык документтерге кол коюлгандан тышкары Бишкектин Фучик көчөсү жакта газ ташыган унаа жарылганы менен эсте калды. Анын кесепетинен алты киши каза болгон.
Япон премьери шыпты тиктегенде. 2015-жылы 26-октябрда Япониянын премьер-министри Синдзо Абэ Кыргызстанга келгенде жер титиреген. Бишкекте жер силкинүүнүн күчү 3,5 баллды түзгөн. Жердин термелүүсүн Абэ дароо сезип, анын шыпты тиктеп калганын Sputnik Кыргызстан агенттигинин сүрөтчүсү Табылды Кадырбеков тартып калган.
Бул жер титирөөнүн эпицентри Афганистандын аймагында катталып, анын күчү Индия, Пакистан жана Тажикстанда сезилген.
Назарбаев келгенде таш кулап. 2015-жылдын 12-августунда Казакстандын президенти Нурсултан Назарбаев Кыргызстанга келгенде, Ысык-Көлгө бара жаткан жолдогу Боом капчыгайында тоонун боорундагы кум-шагыл эшилип түшүп, жолду жаап калган. Анын кесепетинен Бишкек — Балыкчы кан жолунда 5 чакырымга чейин жеткен автотыгын пайда болгон.
Хэллоуин жана Кэрри. Кыргызстанга АКШнын мамлекеттик катчысы Жон Керри былтыр 31-октябрда келгенде адаттан тыш эч нерсе катталган эмес. Бирок, Хэллоуин майрамына туш келген.
Кыргызстанды дүрбөтпөгөн түркмөн лидери. Ал эми Түркмөнстандын президенти Гурбангулы Бердымухаммедовдин сапары учурунда өлкө аймагында адаттан тыш эч нерсени байкаган жокпуз. Түркмөн лидери Кыргызстанга 2015-жылы 5-августта келип кеткен.
