БИШКЕК, 14-июл. — Sputnik. Германиянын федералдык канцлери Ангела Меркель Кыргызстанга расмий иш сапар менен келди.
Аны "Манас" эл аралык аэропортунда президент Алмазбек Атамбаев тосуп алып, андан соң аба майданын аймагында алардын расмий жолугушуусу болду. Бул туурасында президенттин маалымат кызматы кабарлады.
Аба майданында асабаларга илинген Кыргызстан менен Германиянын мамлекеттик туулары желбиреп, Ардактуу күзөт тизилип, эки өлкөнүн гимндери ойнолду.
“Расмий визитттин алкагында Атамбаев менен Меркелдин сүйлөшүүлөрү жүрөт. Лидерлер Кыргызстан менен Германиянын ортосундагы кызматташтыктын абалын жана аны мындан ары тереңдетүү маселелерин сүйлөшөт. Аны менен катар эл аралык жана аймактык маанидеги актуалдуу суроолор боюнча талкуулашат”, — деп кабарлады президенттин маалымат кызматы.
Сүйлөшүүлөрдүн жыйынтыгы менен Атамбаев менен Меркель журналисттер үчүн биргелешкен маалымат жыйынын өткөрөт.
Кош келиңиз, Ангела Меркель айым!
© Фото / Ася Ибраимова
