Намыс барынан бийик турат. Мындан эки ай мурун балбан Жанарбек Кенжеевдин Рио-де-Жанейродо өтө турчу жайкы олимпиадалык оюндарга катышуу үчүн утуп алган жолдомосун күрөш боюнча атайын бирикме тартып алып, балбаныбызды жер каратты эле. "Кыргызда ак ийилет бирок сынбайт" деген кеп бекеринен айтылбаса керек. Эми минтип талыкпаган эмгектин жана сүйлөшүүлөрдүн негизинде балбаныбызга маңдай тери менен жеткен жолдомосун кайтарып беришти. Ийгилик Жанарбек, Кыргызстандын желегин океандын ары жагынан желбиретип, атагын чыгар.
Тоолор тоого уламалап, уланып… Кыргызстандын тоолоруна, анын ажайып кооздугуна бир көргөн киши эле ашык болору бышык. Тоолорго арнап далай акындар ыр жазып, обончулар музыка жаратса, жазуучулар сөздүн берметтери менен аны аябай көркөмдөп даңктаган. Мына эми ушул тоолорубузга ЮНЕСКО дагы кызыгып, аны өзүнүн дүйнөлүк мурастар тизмесине киргизүүгө ашыгып жатышыптыр. Эмне дейбиз, башкалар көз арткан табиятыбызды, тоолорубузду сактайлы, даңктайлы.
Сыр аяктын сыры кетсе да, сыны кетпейт. Негизи Кыргызстандын ар бир жерин мактаса жарашат. Себеби, ошол гана аймакка таандык өзүнүн өзгөчөлүгү менен адамды тартып турат. Канча кылымдан бери сынынан кетпей, келгендерди суктандырган курулуштар да көп. Ошондойлордун бири Каракол шаарында жалаң жыгачтан салынган проваслов чиркөөсүн айтсак болот. Сыр аяктын сыры кетсе да, сыны кетпейт дегендей бул курулуштун кооздугун өзүңөр баалап көргүлө.
Көпөлөк Роналдуну сооротуп. Футбол боюнча Европа чемпионатынын финалдык беттешин көргөн күйөрмандар чындап эле бир тердеп алышты көрүнөт. Себеп дегенде Португалия курама командасынын капитаны Криштиану Роналду француздар менен болгон финалдык беттеште бутун кокустатып алып, оюндан чыккан. Ойнобой калганына кабатырланган күйөрмандар Роналдуну буту ооруп жатканда шайтан көпөлөк келип сооротконун көргөн жок окшойт. Бирок, көпөлөктүн футболчуну чекесинен сүйгөн учурда камералар тартып калган. Португалия негизги оюнчусу жок болсо да өмүрүндө биринчи жолу Европанын чемпиону болушту.
Министр өкмөт башчынын каарына калды. Жол азабы көр азабы деп бекеринен айтылбайт окшобойбу. Кайда болбосун ызы-чуу коштойт. Бишкектен "Манас" аэропортуна бараткан жол сапатсыз оңдолгонун буга чейин өкмөт башчы айтып, аны жасаган жетекчилерге "сөөмөй кезеген" эле. Бул жолдун курулушун тыкыр көзөмөлдөбөгөнү үчүн транспорт жана жолдор министри Замирбек Айдаровго премьер-министр сөгүш жарыялады.
Төңкөрүш жасоону Кыргызстандан үйрөнүптүр. Казакстанда оппозиция өкүлү катары айтылып келе жаткан ишкер Тохтар Тулешов өз өлкөсүндө төңкөрүш жасайм деп 2005-жылы жана 2010-жылдагы төңкөрүштөрдү иликтеп, ал боюнча маалымат топтогонун Казакстандын улуттук коопсуздук боюнча кызматы жар салды. Көрсө, Тулешов КРдин мурдагы президенти Курманбек Бакиев менен коюн-колтук алышып, чогуу сүрөткө түшүп, анан калса Жалал-Абаддын "Ардактуу атуулу" болууга жетишкен экен да. Эмнеси болсо да эркиндиктин жакшы жактарын алып, алдыга умтулуп өсүп, өнүгөлү.
Валюта баасы. Бүгүн Улуттук банк сомдун долларга карата болгон орточо курсу 67.30 сом деп белгиледи.
Мунай баасы. Бишкекте майдын баасы бир нече күндөн бери өзгөрүүсүз. Аи-95 наркы 38 сом, Аи-92 үлгүсүндөгү май 35 сом, ал эми дизель майы 30 сом 50 тыйындан сатылууда.
Соңку сөз ордуна. Ак ийилет, бирок сынбайт.
