БИШКЕК, 9-июл. — Sputnik. Чүй облусунун ички иштер башкармалыгында россиялык турист Дмитрий Ребровго ИИМ ардагерлери чогулткан акчаны тапшыруу аземи өттү. Бул тууралуу аталган башкармалык билдирди.
Эскерте кетсек, Ысык-Көлгө сапар алган россиялык үй-бүлөнү 4-июль күнү Токмоктун жанынан өздөрүн милиция кызматкерлерибиз деп тааныштырган жарандар токтотуп, 45 миң сомун, 20 миң рубль жана 100 евросун алып кетишкен. Милиция каракчылыкка шектелген жарандарды төрт күндөн кийин колго түшүргөн.
"Ардагерлер өздөрү чогулткан акчаны тапшырып, Ребровдордун үй-бүлөсүнө жакшылык каалашты", — деп айтылат билдирүүдө.
Россиялык жаран меймандостук үчүн ыраазычылык билдирип, каракчыларга туш болгондон кийинки окуяларга аябай таң калып жатканын жашырган жок.
ОИИБ каракталган акча соттун чечиминен кийин берилиши мүмкүн экенин белгилеп, учурда тергөө иштери жүрүп жатканын кошумчалады.
