БИШКЕК, 8-июл. — Sputnik. Майып баласын дарылатуу үчүн Ысык-Көлгө келе жатып, каракчыларга туш болгон россиялык үй-бүлө Ысык-Көлдөгү пансионаттардын биринен бекер дарылана турган болду. Бул тууралуу кыргыз өкмөтүнүн аталган облустагы өкүлчүлүгү билдирди.
Бул иш премьер-министр Сооронбай Жээнбеков, ИИМ башчысы Кашкар Жунушалиев жана Чүй ОИИБ жетекчиси Капар Батырканов жеке көзөмөлүнө алып, Кылмыш жаза кодексинин 166-беренесинин (Шылуунчулук) негизинде кылмыш иши козголгон.
Бүгүн ИИМ аталган кылмышка шектүү катары эки киши кармалганын, алар мурда укук коргоо органдарында иштеп келгенин кабарлады.
"Сиздердин үй-бүлө туш болгон окуя буга чейин эч болгон эмес, ишенип коюңуздар. Кыргызстандыктар абдан меймандос, колу ачык эл. Буга көп ирет күбө болосуздар", — деди өкүл Асхат Акимбаев үй ээси Дмитрий Ребров менен жолугуп жатып.
Россиялык мейман көрсөтүлгөн жардам үчүн ыраазычылык билдирип, укук коргоо орган кызматкерлеринин ыкчам аракетине баа берди.
Ысык-Көл облусунун жетекчилиги россиялык үй-бүлө кабылган окуяны көзөмөлгө алып, кандай маселе болбосун, жардам берүүгө даяр турат.
