БИШКЕК, 8-июл. — Sputnik. Россиядан Ысык-Көлгө майып баласын дарылатуу үчүн алып келе жаткан россиялык үй-бүлөнү карактагандар туристтердин 20 миң рубль, 45 миң сом жана 100 евросун алып кетишкен. Бул тууралуу ИИМ билдирди.
Мындан төрт күн мурун болгон окуяны премьер-министр Сооронбай Жээнбеков, ИИМ башчысы Кашкар Жунушалиев жана Чүй ОИИБ жетекчиси Капар Батырканов жеке көзөмөлүнө алып, кылмыш жаза кодексинин 166-беренесинин (Шылуунчулук) негизинде кылмыш иши козголгон.
Иликтөө иштеринин натыйжасында өздөрүн милиционермин деп тааныштырган жарандар такталып, аларды жабырлануучулар фотороботтон таанып беришкен.
Аталган кылмышка шектүү катары Таластын 42 жана 47 жаштагы эки тургуну кармалып, убактылуу кармоочу жайга киргизилди. Алардын буга чейин Аламүдүн жана Свердлов РИИБде иштегени, туура эмес тартиби үчүн кызматтарынан алынганы аныкталган.
Учурда кармалгандардын башка кылмыштарга тиешелүүлүгү такталып жатат.
