БИШКЕК, 30-июн. — Sputnik. Түркиянын Стамбул шаарындагы "Ататүрк" аба майданында болгон террордук кол салуудан жабыркаган Кыргызстандын жараны Бахтияр Юнусов ооруканадан чыкты, азыр абалы жакшы. Бул туурасында биздин мекендеш Sputnik Кыргызстан агенттигине билдирди.
Белгилей кетсек, КРдин Стамбулдагы консулдугунун маалыматы жарылуудан Кыргызстандын жараны Бахтияр Юнусов дагы жаракат алып, ооруканага алып келинген.
Бахтиярдын апасы Малика Юнусова уулу аэропортко досуна билет алуу үчүн аны менен чогуу барып, жарылууга кабылганын айткан эле.
"Азыр абалым жакшы, ооруканадан чыктым. Колумду кайра таңдыруу үчүн ооруканага келип-кетип турушум мүмкүн", — дейт жаракат алган КР жараны Бахтияр Юнусов.
Акыркы маалыматтар боюнча куралдуу кол салуудан 41 киши каза болуп, 239 адам түрдүү жаракаттарды алган.
