БИШКЕК, 29-июн. — Sputnik. Кыргызстандык жаран Тилек Токомбаев Стамбулдагы теракт учурунда аэропорттун аймагында жүрүп, жардыруулар жана автоматтан аткылоо анын көз алдында болгонун Sputnik Кыргызстанга айтып берди.
Ал Стамбулда жарылуу болгон учурда Одессага учуу үчүн "Ататүрк" аэропортунда жүрүп, аз жерден ок жеп кала жаздаган.
28-июнда жергиликтүү Стамбул убактысы боюнча кечки 22.00 дө "Ататүрк" аэропортунда теракт болуп, 36 киши каза таап, 150дөй киши түрдүү жаракаттарды алган. Жардыруу болгон учурда Токомбаев аба майданда жүргөн. Ал качан келип атып кетет деген коркунуч болду деп айтып берди. Биринчи жарылуу Тилек турган жерден болжол менен 40 метрдей аралыкта болуптур.
"Ал учурда жүгүмдү тапшырып, паспорт көзөмөлү жакка басып бара жаткам. Жарылуу болору менен эле террорчулардын бири автомат менен татыратып тегеректеги элди аткылай баштады. Кишилер дүрбөлөңгө түшүп, алардын ичинде мен да сыртты көздөй чуркадык. Аткылоонүн үнү артымдан калбай угулуп жатканын сездим. Эл бири-бирин жөөлөп, түртүшүп баарыбыз жаныбызды сактап калганга аракеттендик. Ызы-чуу, бир жаман учур болду. Мени аэропортко узатып келген бала экөөбүз көздөн далдаа жерге жашына калдык",— деп айтып берди мекендешибиз Токомбаев.
Анын айтымында, балдар ал жерде 2 сааттан ашык убакыт болушкан.
Бир аз кечирээк кыргызстандыктар Стамбулдагы кыргыз консулдугу менен байланышып, кайсыл жерде экендигин кабарлашкан.
Консул Руслан Молдакунов Sputnik Кыргызстан агенттигине жабыр тарткандардын ичинде Кыргызстан жарандары бар-жоктугун тактап жаткандыктарын билдирди.
