БИШКЕК, 17-июн. — Sputnik. Жалпы республикалык тестирлөөнүн алкагында тарых сабагынан тест тапшырууну каалагандар башка предметтерге караганда быйыл көп экенин Sputnik Кыргызстан агенттигине Билимди жана билим берүү методдорун баалоо боюнча борбордон (ББМББ) билдиришти.
Аталган борбордун маалыматына ылайык, тестирлөөдөн 51 миң абитуриент өткөн, ал эми түрдүү себептерден улам тестке катышпай калгандар 23-24-июнда тапшырат. Негизги тапшырмадан башка каалагандар алты предмет боюнча да тест тапшыра алышат. Алар: тарых, физика, математика, биология, химия жана англис тили. Кошумча предметтик тесттердин саны абитуриенттердин өзүнөн көз каранды.
"Тарых сабагынан 26,3 миң киши тест тапшырса, биологиядан 16,6 миң, химиядан дээрлик 13 миң, математикадан 12,4 миң киши тест тапшырды. Андан сырткары, англис тилинен 9,2 миң, физикадан 683 абитуриент өз күчүн сынады", — деп айтылат маалыматта.
Кошумча тест тапшыргандардын көп болушун бюджетке өтүү үчүн предметтик сабактардан тест тапшыруу керектиги менен түшүндүрүшүүдө.
