БИШКЕК, 6-июн. — Sputnik. Борбор калаанын Фучик көчөсүндө жайгашкан кампанын аймагында техникалык эрежелердин сакталбагандыгынан улам газ ташуучу үч автоунаа күйүп кеткен. Бул туурасында ИИМдин маалымат кызматы кабарлады.
"Өрт жумушчулар газ ташыган автоунааларды оңдоп жатканда алардын биринен чыккан. Жалбырттаган жалындан улам, өрткө чулганган автоунаа жарылып кеткен. Кырсык болгон жерден шашылыш түрдө атайын техникалар менен оор жүк ташыган автоунаалар чыгарылды", — деп айтылат билдирүүдө.
Маалымат кызматы учурда шаардык милициянын ыкчам-иликтөө тобу иш алып барып жатканы жана иликтөө бүткөндөн кийин жагдайга баа берилерин айтышты.
"Кырсык учурунда газ ташыган үч автоунаа күйүп кеткен. Өрттөн 14 киши жаракат алган",— деп билдиришти ИИМден.
Бүгүн кечинде Бишкектин түндүк-батыш тарабында газ ташуучу унаа жарылып, ири өрт чыккан. Кырсыктан 14 киши жабыркап, каза болгондор да бар экени айтылууда.
Кырсык болгон жерден алынган алгачкы кадрларды Sputnik Кыргызстандын фотолентасынан көрө аласыздар>>
