БИШКЕК, 15-май — Sputnik. Бишкек шаарындагы Ала-Тоо аянтында бүгүн саат 20.00дөн тарта көчмөндөр оюнуна канча күн калганын санай турчу саат иштеп баштайт. Бул тууралуу Дүйнөлүк көчмөндөр оюнунун катчылыгынан билдиришти.
"Сааттын дизайнын белгилүү художник-скульптор Алимжан Амантаев жасаган. Ал улуттук оймо-чиймелер менен кооздолуп, сары, көк жана кызыл түс менен боёлгон", — деп айтылат билдирүүдө.
Оюнга канча күн калганын санай турчу сааттын ачылыш салтанатында 120 темир комузчу өнөрүн тартуулайт. Экинчи Дүйнөлүк көчмөндөр оюнунун ыктыярчылары ырчылар — Кайрат Примбердиев, Гүлжигит Калыков, Жийдеш, Аяна, Айыма, Гүлзада өз өнөрлөрүн тартуулайт.
Экинчи Дүйнөлүк көчмөндөр оюну 3-8-сентябрда өтөт. Анда улуттук спорттун 26 түрү боюнча мелдештер болот. 40тай мамлекеттен командалар келери күтүлүүдө.
