Ошто Жеңиш парадына 10 миң киши келди

БИШКЕК, 9-май — Sputnik. Ош шаарында Улуу Жеңиштин 71 жылдыгына карата борбордук аянтта 10 миң киши катышкан салтанаттуу иш-чара болуп өттү.

Калаа мэри Айтмамат Кадырбаев, Россиянын Ош шаарындагы башкы консулу Александр Кудряшов, ошондой эле жоокерлер, мекеме жетекчилери ардагерлерди Жеңиш майрамы менен куттукташты.

"Силердин эрдигиңерди баалап-барктоо абдан маанилүү. Келечек урпактын тынч жашоосу үчүн көптөр өмүрүн берди. Жеңиш үчүн сиздерге терең ыраазычылык!" — деди Кадырбаев. 

Парад алдында Ошто жашаган ардагерлерди шаардын борбордук көчөлөрүнөн сейрек кездешүүчү унаалар менен ташып, автожүрүш өттү.

Майрамдык иш-чара маалында 1,5 миңден ашуун катышуучусу бар бий топтору, окуучу менен студенттер Жеңиш вальсын бийлешти. Оркестрдин коштоосу менен "Өлбөс полктун" колоннасы өтүп, анда 700гө чукул адам Улу Ата Мекендик согушта фашисттер менен кармашкан аталарынын, чоң аталарынын сүрөттөрүн алып өтүштү.

Борбордук көчөдө ардагерлер алдында аскер кызматкерлери, студенттер жана окуучулар салтанаттуу параддан өтүштү.

Ал эми Токтогул атындагы паркта ардагерлер үчүн талаа ашканасы уюштурулуп, жоокер боткосу таратылды.

Ош шаардык аскер комиссариатынын маалыматы боюнча Жеңиштин 71 жылдыгын 20 ардагер майрамдады. Алардын көбү учурда 90 жаштан ашкан.