БИШКЕК, 9-май — Sputnik. Президент Алмазбек Атамбаев Улуу жеңиштин 71 жылдыгына арналган эскерүү иш-чарасында дүйнө кайрадан жаңы капсалаңдарга кабылып, ар жерде кан төгүлүп жаткан кырдаалда тынчтык сөзүнүн мааниси жүз эселеп өсүп турганын айтты.
Мамлекет башчысы Бишкектеги Өчпөс отко гүлчамбар коюп, жалпы кыргызстандыктарды Жеңиш күнү менен куттуктап жатып, азыркы бейпил жашоо үчүн күрөшкөн аталардын эрдиги унутулбай тургандыгын белгиледи.
Атамбаев канча жыл өтсө да, 9-май – Жеңиш күнү биз үчүн эң ыйык майрамдардын бири катары кала берерине токтолду.
"Биз бүгүн эл-жерибизди баскынчылардан коргоп калган, согушта жана оорукта Жеңишке салым кошкон ардагерлерге башыбызды ийип, таазим кылып турабыз. Биз ардагерлерибиздин эмгегин актап, максатын улайлы. Алардын ар бир күн, ар бир мүнөт өмүрүнө кам көрүп туралы", — деди президент.
Атамбаев катары улам суюлуп бара жаткан ардагерлерди эскерип, улгайгандар кадимкидей караан экендигин айтты.
"Бүгүн эскерүү жыйынга келген ардагерлердин катарын карап, көзүбүзгө жаш келет. Тилекке каршы, төшүнө орден-медалдар толо, арабызда жайкалып турган карыяларыбыздын катары күн сайын суюлуп баратат. Азыр таяк таянып, же неберелери жөлөп-таяп турган ардагер аталарыбыз менен апаларыбызга айтарым: силердин карааныӊар эле бизге канчалаган күч-кубат!" — деди президент.
Мамлекет башчысы азыркы капсалаңы көп дүйнөдө тынчтык сөзүнүн маанисине токтолуп, аталардын эрдиги биримдиктин жана ынтымактын жаркын символу болуп каларына токтолду.
Бүгүн дүйнөнүн бир топ өлкөлөрүндөй эле Кыргызстанда да Улуу Ата мекендик согуштун аякташы – Улуу Жеңиштин 71 жылдыгы белгиленип жатат.
