БИШКЕК, 9-май — Sputnik. Кыргызстандыктарды Жеңиш күнү менен куттуктаган Жогорку Кеңештин төрагасы Чыныбай Турсунбеков кийинки муундар Улуу Ата Мекендик согуштун катышуучуларынын эрдигине баш ийип миң мертебе таазим кыларын айтты. Бул туурасында парламенттин маалымат кызматы билдирүү таратты.
Анда 71 жылдыгы белгиленип жаткан Жеңиш күнүнүн мааниси зор экендиги, ал миллиондогон адамдардын согуштагы эрдиги менен ооруктагы эмгегинин, жалпы элдин кажыбас кайратынын аркасында жаралган жеңиш экендиги белгиленген.
"1945-жылдын 9-майы – адам баласынын оор кайгысы менен зор кубанычы тогошкон күн. Биз – Улуу Жеңиш ээлеринин урпактары кан майданда каза болгондордун, андан кийин көзү өткөн согуш жана оорук ардагерлеринин, азыр да арабызда жүргөн карыяларыбыздын чыныгы эрдигине сыймыктануу менен, башты ийип миң мертебе таазим кылабыз", — деген Турсунбеков.
Спикер учурда өлкөдө миңге жетпеген ардагер бардыгын, алар чыныгы каармандыктын үлгүсү катары кала берерин айткан.
Ал ардагерлерге карыялык каада, улуулук нуска жана чың ден соолук, бакубат өмүр каалаган.
