БИШКЕК, 6-май — Sputnik. Кармалгандардын бирөө Кыргызстан жараны, ал эми үчөө Кыргызстанда туулган, бирок башка мамлекеттин атуулдугун алышкан. Бул туурасында Sputnik Кыргызстанга Москвадагы Мещанск жана Преображенск сотторунун маалымат кызматтарынын кабарлашты.
Алардын маалыматында кармалгандардын бири – Кыргызстанда туулган киши 9-Майда элге ок атууга буйрук алган деп айтылган.
Москва шаарындагы Мещанск аймактык сотунун маалымат кызматы камалгандардын бири Фарходжон Муратов Кыргызстандын жараны деген маалымат берди.
"Муратов 3-июлга чейин камакка алынды. Ал РФтин Кылмыш кодексинин 222-беренесинин (Куралды мыйзам алып жүргөн, саткан, ташыган жана бирөөлөргө берген) негизинде күнөөлөнүп жатат. Ал эми кармалган дагы экөө Сирожидин Эргашов менен Анваржон Тошболтаев Кыргызстанда туулган, бирок, Россиянын жараны",— деди аталган соттун маалымат катчысы Юлия Бочарова.
Ал эми Преображенск сотунун маалымат катчысы Александра Савельева 5-майда кармалган Айбек Саидов Тажикстандын жараны экендигин билдирди.
"Биздеги маалыматтарга караганда ал Кыргызстанда туулган, бирок, Тажикстандын жараны. Саидовго РФтин Кылмыш кодексинин 222-беренесинин (Куралды мыйзам алып жүргөн, саткан, ташыган жана бирөөлөргө берген) негизинде күнөө тагылды. Буга кошумча 317-берене (Тартип коргоо органынын кызматкерлеринин өмүрүнө коркунуч келтирген) менен айыпталууда. Ал Москвада жардыруу даярдаган деп шектелип жатат",— деди Савельева.
Шаршемби күнү Федералдык коопсуздук кызматынын өкүлдөрү май айындагы даталуу күндөрү Москва жана Подмосковье аймагында майрамдап жүргөн жай жарандарды аткылоону пландаган Борбор Азия өлкөлөрүнүн атуулдарын кармагандыгын боюнча маалымат тараган. Кармалгандар мындай иштерди Сирия жана Түркиядагы эл аралык террордук уюмдардын башчыларынын тапшырмасы менен жасамак болушкандыгы айтылган.
