БИШКЕК, 27-апр. — Sputnik. Бүгүн Улуттук китепканада Тарых жана маданият жылынын алкагында тарыхый инсан Садыр аке Жолболду уулунун 195 жылдыгына карата илимий конференция өткөрүлөт. Бул тууралуу Улуттук китепкананын маалымат кызматы билдирди.
Иш-чара "Кожояр Ата" коомдук фонду менен Улуттук китепкана тарабынан уюштурулуп, бүгүн саат 11.00дө башталат.
Конференциянын негизги максаты — кыргыз элинин сакталышына жана өнүгүшүнө опол тоодой салымын кошкон, көрүнүктүү тарыхый инсан Садыр акенин элесин эскерүү болуп эсептелет.
Белгилей кетсек, Садыр Жолболду уулу 1821-жылы жарык дүйнөгө келген. Ал кичинесинен тартып тунук акылы жана эске тутумунун күчтүүлүгү менен башкалардан айырмаланган. Санжырадагы маалыматтар боюнча Садыр аке элине ак кызмат өтөп мыкты коомдук ишмерлердин катарын толуктаган. Ал элдин сый-урматына татып "Аке" наамына ээ болгон.
