Шаардык Тез жардам кызматынан бул окуяны тастыктап, ал жакка медиктердин бригадасын жибергендигин айтышты.
БИШКЕК, 9-апр. — Sputnik. Бишкек шаарындагы Исанов-Чүй көчөлөрүнүн аймагында чет элдик жаранга эки ирет ок атылып, ал киши колунан жаракат алып, аман калды. Бул туурасында жеринде Sputnik Кыргызстан маалымат агенттигине окуяга күбө болгон адам билдирди.
"Горький атындагы парк жакта отурганбыз. Бир учурда ары жактан жарылгандай болгон үн эки ирет чыкканынан чуркап барсак, бир кишиге ок тийиптир. Аткан адам ок чыгарган куралын таштай качты. Азият түспөлүндөгү бою узун адам экен", — деп айтып берди күбө болгон Алмаз аттуу жаран.
Күбө "ал кишини багы бар экен, аман калды" деп кошумчалады.
Шаардык Тез жардам кызматынан бул окуя болгонун, аларга милиция кабарлагандыгын тастыктап, ал жакка медиктердин бригадасын жибергендигин айтышты.
