БИШКЕК, 9-апр. — Sputnik. Президент Алмазбек Атамбаев азыркы каатчылык шартында электр кубатына тарифтерди көтөрүүгө болбойт деди. Мындай пикирин президент Отун-энергетикалык комплексин жөнгө салуу боюнча мамлекеттик агенттиктин директору Таалайбек Нурбашев, "Улуттук энергетикалык холдинг компаниясынын" башкармалыгынын төрагасы Айбек Калиевди кабыл алып жатканда айтты.
Жолугушууда мамлекет башчысы электр кубаттуулугун импорттоо боюнча жана 2014-2017-жылдарга Кыргызстандын орто мөөнөткө тарифтик саясатында каралган 20 пайыздын ордуна электр кубаттуулугуна тарифтерди 10 пайызга көтөрүү боюнча пландар жөнүндө маалымат алды.
Атамбаевге 2016-жылдын 1-апрелинен тартып, жылуулук кубаттуулугуна тарифтерди 20 пайызга көтөрүү боюнча пландар жөнүндө да баяндама берилди.
"Дүйнөлүк экономикалык каатчылыктын учурунда Кыргызстандын калкы үчүн электр кубаттуулугуна тарифтерди кайра кароого өтө этият мамиле жасап, терең жана кылдат иштеп чыккандан кийин гана чечим кабыл алуу керек. Азыркы шартта электр кубаттуулугуна тарифтерди көтөрүүгө болбойт", — деген Атамбаев.
Мамлекет башчысы финансылык жоготууларды азайтуу үчүн аталган тармакта резервдер бардыгын айткан.
"Ата мекендик энергетиканын кубаттуулугун өөрчүтүү жана бекемдөө, негизги станцияларды модернизациялоо, жаңы кубаттуулуктарды ишке киргизүү, электр кубаттуулугунун коммерциялык жоготууларын мүмкүн болушунча азайтуу боюнча иштерди улантуу зарыл", — деген президент
Электр тарифтери боюнча коомчулукта акыркы учурда нааразычылыктар көп жаралып келет. Бул маанайда өзгөчө, Нарын облусунун тургундары чыгып, жеңилдиктерди берүү, коюлган бааны кайра кароо маселесин коюшкан.
Өткөн жылдын август айынан тарта элект кубатына болгон тарифтер 10 тыйынга өскөн. Учурда бир киловатт-сааттын баасы 77 тыйын турат.
