БИШКЕК, 18-мар. — Sputnik. Токтогул районунун тургундары электр энергиясына болгон баа алар үчүн ГЭСтен чыккан нарк менен берүүнү талап кылып митингге чыгышты. Өз талаптарынын аткарылышы боюнча бийликке 15-апрелге чейин мөөнөт берди. Бул тууралуу демилгелүү топтун төрагасы Жайлообай Ташыкул уулу Sputnik Кыргызстан маалымат агенттигине билдирди.
Анын айтымында, райондун эли бул маселени үч жылдан бери эле көтөрүп келет.
"Биздин талап кечээ эле башталган жок, ал үч жыл мурун эле коюлуп келген. Токтогул районунун "Өзгөчө" деген статусу бар. Ал 1999-жылдын 1-январынан тарта күчүнө кирген. Ага ылайык, Токтогул районуна электр энергиясы ГЭСтен иштелип чыккан нарк боюнча өкмөт белгилеген бааны эске алуу менен берилиши керек деп жазылган. Азыр ГЭСтен 1 киловатт электр энергиясынын иштелип чыккан баасы 8,8 тыйынды түзөт", — деди Ташыкул уулу.
Бүгүнкү күнү Токтогул районунун тургундары 150 киловатт энергия үчүн 8,8 тыйын, 700 киловаттка чейин 77 тыйын, андан жогору болсо 2,16 сомдон төлөп жатканын Ташыкул уулу кошумчалады.
"Район тургундарына мындай чектөө киргизилбеши керек. Себеби, "Өзгөчө статуста" мындай чек киргизилсин деп көрсөтүлгөн эмес", — деди ал.
Токтогул районунун акими Майор Сатымкулов бүгүн митингге чыккан эл менен жолукканын айтты.
"Тариф маселесине нааразы болгондор Токтогул районунда бар. Митингге чейин 11-мартта кайрылышкан. Биз тиешелүү инстанцияларга жиберип алардын талаптарын айттык", — деди Сатымкулов.
Район акими митингге чыккандар бир гана электр энергиясынын тарифи боюнча чыкканын баса белгиледи.
Райадминистрациянын маалыматына ылайык, митингге 120-150 киши чыккан. Ал эми демилгелүү топтун маалыматы боюнча 500дөй киши катышты.
Демилгелүү топтун төрагасынын айтымында Токтогул суу сактагычынын алдында 33 миң гектер жер калган. Андан сырткары 24 айыл-кыштактар көчүрүлгөн.
