БИШКЕК, 4-апр. — Sputnik. Кыргызстандын таэквандочулары Алматыда өткөн эл аралык турнирде 13 медаль утуп алышканын Мамлекеттик жаштар иши, дене тарбия жана спорт агенттиги билдирди.
Турнир 30-31-март күндөрү өтүп, ал Казакстандын көз карандысыздыгынын 25 жылдыгына арналды.
WTF таэквандо академиясынын президенти Убайдула Тохтурбаев мелдешке Казакстан, Россия, Өзбекстан жана Кыргызстандан барган 500дөн ашуун спортчу катышканын белгиледи.
Кыргызстандыктар тогуз алтын, эки күмүш жана эки коло медаль утуп алып, командалык эсепте экинчи орунду ээлешти.
Ал эми чейрек финалдык оюнда жеңилип калган Кыргызстандын эки спортчусу Бек Абдилакимов менен Иман Азамат уулу жеңишке умтулуусу үчүн диплом менен сыйланышты.
