БИШКЕК, 4-апр. — Sputnik. Жамааттык коопсуздук келишим уюмунун (ЖККУ) башкы катчысы Николай Бордюжа Тоолуу Карабахтагы кырдаал боюнча Армениянын аскердик-саясий жетекчилиги менен дайым байланышта болуп жатканын аталган уюмдун маалымат кызматы билдирди.
Бордюжа Армениянын тышкы иштер министри Эдвард Налбандян жана коргоо министри Сейран Оганян менен кечээ да телефондон байланышып, аймактагы абалдан кабар алды.
Тараптар кырдаалды тез арада жөнгө салып, согуштук аракеттерди токтотуу үчүн бардык күч жумшалышы керектигине токтолушту.
"ЖККУ катчылыгы абалга тыкыр көз салып турат. Уюмга мүчө мамлекеттердин бул боюнча көз карашы бирдей — чыр-чатакты тынчтык жолу менен чечүү. Ал эми кагылышуунун уланышы бүтүндөй Кавказ аймагы үчүн кооптуулук жаратат. Баарыбызга тынчтык гана керек", — деди башкы катчы.
Бордюжа Тоолуу Карабахтагы кагылышуу аймакка тынчтык орнотуу боюнча сүйлөшүүлөрдү жүргүзүүгө укуктуу эл аралык механизмдердин алкагында саясий жол менен гана чечилерин белгиледи.
Азербайжан менен Армения Тоолуу Карабахтын айынан 1988-жылдан бери чатакташып келет. Анда армян эли басымдуулук кылган Карабах автономиялуу облусу Азербайжандын курамынан чыкканын билдирген.
