БИШКЕК, 2-апр. — Sputnik. Армения менен Азербайжан Карабах аймагында абалдын курчуп жатканын жар салышты: Азербайжандын Коргоо министрлиги Армениянын Куралдуу күчтөрү аткылай баштаганын айтса, армениялык тарап Азербайжан баскынчылык аракетин кылып жатат билдирди.
"Армениянын Куралдуу күчтөрү ок атууну токтотуу режимин бузуп, өткөн сутка ичинде 127 жолу курал пайдаланды", — деп билдирди Азербайжандын Коргоо министрлиги.
Өз кезегинде Армения ишембиге караган түнү Азербайжан тараптан танк, артиллерия жана авиациялык күчтөрдү пайдалануу менен баскынчылык аракеттер болгонун жар салды.
Азербайжан менен Армения Тоолуу Карабахтын айынан 1988-жылдан бери чатакташып келет. Анда армян эли басымдуулук кылган Карабах автономиялуу облусу Азербайжандын курамынан чыкканын билдирген.
