Бишкекте адам өмүрүн алган бактын кулашы видеокамерага тартылып калган

Мектеп сыртына орнотулган видеокамерага бактын кулаган учуру тартылып калган. Бак токтоп турган бир машинаны жана жолдон өтүп бара жаткан бир автоунааны басып калган. 

Окуя 27-мартта саат 19.0дөр чамасында Турусбеков көчөсүндө (Пушкин менен кесилишкен жерде) болгон. Бак токтоп турган Toyota Camry машинасын жана көчөдөн өтүп бараткан Toyota Estima автоунаасын басып калып, 37 жаштагы айдоочу каза болду. Токтоп турган автоунаанын ичинде киши болгон эмес. Алдын ала маалыматтар боюнча каза болгон жарандын төрт баласы болгон.

Күбөлөрдүн айтымында, кулаган бак мектептин кире беришинде тургандыктан анын жанынан окуучулар такай өтүшчү.

Кулаган бактын буталганын видеодон байкоого болот. Балким аны муниципалдык кызмат кыюуга даярдашы да мүмкүн.

Кырсык болгон учурда эч кандай шамал деле болгон эмес.

Окуяга күбө болгон Эмил Абдуманаповдун айтымында, бак автоунааны басып калгандан кийин анын дөңгөлөгү айланып түтүн чыккан. Себеби, айдоочу педалды баскан бойдон калган. 

"Ал жерден түтүн чыккандыктан биз өрт чыгат го деп, өрт өчүрүүчү каражаттарды алып келдик. Бир аздан кийин куткаруучулар жана тез жардам кызматынын өкүлдөрү келип, айдоочунун денесин машинадан чыгарышты", — дейт ал.

Абдуманапов айдоочу кулап келе жаткан бакты деле байкабашы мүмкүн экенин, себеби, окуя каш кабактын ортосунда болгонун кошумчалады.