БИШКЕК, 25-мар. — Sputnik. Милиция кызматкерлерине каршылык көрсөтүп, алардын погонун жулуп алган учур бир күндө эки жолу катталганын Бишкек ШИИБ билдирди.
Маалыматка ылайык, кечээ, 24 мартта Бишкектин 20 жаштагы тургуну милицияга арыз менен кайрылып, Павлов көчөсүндөгү ашканада белгисиз жаран сөгүнүп-сагынып, келген кардарларга асылып жатканын айткан. Ленин РИИБ кызматкерлери окуя болгон жерге барып, 42 жаштагы жаранды кармашкан. Бирок ал каршылык көрсөтүп, кызматкерлердин погонун жулуп, формасын айрып салган. Бул боюнча учурда текшерүү башталды.
Ошол эле күнү кечинде Токтогул жана Бейшеналиева көчөлөрүнүн кесилишинде жолдон ары-бери өткөн адамдарга асылган 25-30 жаштардагы мас жаран милиционерлердин эскертүүсүн элес албай, кайра алар менен уруша кеткен. Кармоо маалында кызматкерлердин погонун жулуп алган. Мындан кийин укук коргоо органдарынын өкүлдөрү аталган жаранды Ленин РИИБнин милиция бөлүмүнө алып келишкен.
