БИШКЕК, 25-мар. — Sputnik. Кыргызстандын футбол боюнча курама командасы 2018-жылы өтө турган Дүйнө чемпионатына катышпай калды.
Кечээ тандоо турунун алкагында бир тайпадагы Австралия менен Тажикстан (7:0) жана Иордания менен Бангладеш беттешти.
Кыргызстандык команданын эсебинде учурда 11 упай бар. 24-марттагы оюнга чейин алдыда 15 упай менен Австралия келе жаткан, Иордания 13 упай менен экинчи орунда турган. Улуттук команда үчүнчү катарда. Ал эми Тажикстан беш упай менен төртүнчү, Бангладеш бир упай менен бешинчи орунда келе жатат.
Эми Австралиянын 18 упайга ээ болуп, тайпанын лидери болду. Иордания 15 упай топтоду. Кыргызстан эми Тажикстандын командасын утуп алган күндө да экинчи орунга жете албайт.
2018-жылы өтө турган Дүйнө чемпионатынын финалдык бөлүгү Россияда өтөт.
Аталган беттешүү кандай жыйынтык менен аяктаганына карабастан кыргызстандык команда "В" тайпасында үчүнчү орунду сактап калат. Бул командага Азия чемпионатынын тандоо турунан түз орун алышына мүмкүнчүлүк берет.
