Бакыт Асанов: Үңкүр-Тоону Өзбекстанга берүү боюнча эч кандай токтом чыккан эмес

Жазылуу
Yandex newsTelegram
Коомчулукта өкмөт башчы Жалал-Абад облусунун аймагында жайгашкан Үңкүр-Тоону коңшу өлкөгө берүү боюнча токтомго кол койгон деген маалыматтар тарап кеткен.

БИШКЕК, 24-мар. — Sputnik. Премьер-министр Темир Сариев Үңкүр-Тоону Өзбекстанга таандык деген эч кандай токтомго кол койгон эмес деп билдирди өкмөт башчынын маалымат катчысы Бакыт Асанов.

"Премьер-министр Темир Сариев Үңкүр-Тоону Өзбекстанга таандык деген эч кандай токтомго кол койгон эмес. Тескерисинче, маалыматтык коопсуздукту күчөтүү, аймактардагы байланыш жана интернеттин сапатын жогорулатуу боюнча кошумча станция куруу тапшырмасын берген", — деди Асанов.

Маалымат катчы, бир катар жарандар чек ара маселесин жеке кызыкчылыгына пайдалануу менен бул маселени ого бетер күчөтүп, көйгөйдүн тереңдешине шарт түзүп берүүдө деген пикирин билдирди.

"Чек ара жана коопсуздук маселелердин аткарылып жаткан иштердин баарын эле ачык айтууга болбойт жана өтө этият мамиле кылуу зарыл", — деди ал.

Бул маселе боюнча өкмөттүн чек ара иштери боюнча өкүлү Курбанбай Искандаров Үңкүр-Тоо турган аймакты берүү эмес, ал жерге станцияларды куруу үчүн кошумча жер бөлүү боюнча протокол түзүлгөнүн айтты.

Өкмөт Үңкүр-Тоону Өзбекстанга берген эмес
Өкмөт буга чейин аталган тоонун башындагы телемунараны башка жерге көчүрүү боюнча маалымат чындыкка дал келбейт деп билдирген. Чаткал, Ала-Бука, Аксы райондорунун маалыматтык коопсуздугун камсыздоо жана санариптик берүүгө өтүү программасын ишке ашыруу максатында Үңкүр-Тоодогу "Кербен" телемунарасы (РРС-24) менен бирге иштей турган жаңы станция куруларын белгилеген.

Муну менен бирге кыргыз өкмөтү Үңкүр-Тоо кыргыз-өзбек мамлекеттик чек арасын делимитациялоо жана демаркациялоо боюнча өкмөт аралык комиссия тарабынан такталбаган жана макулдашылбаган аймак экенин белгилейт.

Жаңылыктар түрмөгү
0