БИШКЕК, 23-мар. — Sputnik. Кыргыз өкмөтү Үңкүр-Тоодогу "Кербен" телемунарасын көчүрүү боюнча маалымат чындыкка дал келбей турганын билдирди.
Ага ылайык, Чаткал, Ала-Бука, Аксы райондорунун маалыматтык коопсуздугун камсыздоо жана санариптик берүүгө өтүү программасын ишке ашыруу максатында Үңкүр-Тоодогу "Кербен" телемунарасы (РРС-24) менен бирге иштей турган жаңы станция курулат.
Эскерте кетсек, учурда жергиликтүү кеңештин депутаттарына таянуу менен айрым маалымат каражаттарында жана Интернет айдыңында "Кербен" мунарасын башка жакка көчүрүп, станция жайгашкан жер Өзбекстандын карамагына өтөт деген маалымат тарап кеткен.
"Кербен" телемунарасы эч жакка көчүрүлбөйт. Бул аймактан өткөн чек ара сызыгы боюнча маселе Кыргызстан менен Өзбекстандын өкмөттөрү ортосунда чечилет", — деп айтылат билдирүүдө.
Мындан улам өкмөт Үңкүр-Тоо өзбектерге кетет деген маалымат чындыкка дал келбей турганын белгилеп, коомчулукту дүрбөлөңгө түшүрбөөгө чакырды.
