БИШКЕК, 14-мар. — Sputnik. Түркиянын борбору Анкара шаарында болгон терактыдан курман болгондордун саны өсүп, 34 кишиге, ал эми жаракат алгандар 125 адамга чукулдады. Алардын ичинен 19 кишинин абалы өтө оор.
Жардыруу кечээ, 13-мартта Түркиянын өкмөт башчысынын кеңселеринин бирине жакын жерде кечке жуук жасалган. Кырсыкка себеп — мина коюлган автоунаа болгондугу айтылууда.
Кыргызстандын Түркиядагы элчилиги кырсыкта кыргызстандыктардын бар-жогун тактап жатышкандыгын билдирди.
Соңку теракт Түркия аймагында Анкара жана Диярбакыр шаарларында болуп, эки кырсыктан жалпысы 68ге чукул адам өлгөн. Ага чейин январдын ортосунда ошол эле Диярбакыр аймагында жарылуу болуп, бир нече киши каза таап, 36дан ашуун адам жаракат алган.
