БИШКЕК, 2-мар. — Sputnik. Москвада эки кыргыз кызды суракка алып мазактаган "патриот" жигиттер кармалды. Бул тууралуу ички иштер министрлигинин маалымат кызматы билдирди.
Видео тасма алгач социалдык тармактарда катуу талкууга алынып, кийин массалык маалымат каражаттары аркылуу жарыяланган. Жыйынтыгында окуя массалык резонанка айланган.
ИИМдин маалыматына ылайык, ыкчам иликтөө иштери 15-февралда башталып, окуя болгон жер аныкталган. Бирок, тартип бузуучулар менен жабыр тарткан кыздарды ошол замат аныктоо мүмкүн болгон эмес. Себеби, окуя болгон түнкү клубдагы видео камералар жакшы иштебегени белгилүү болгон.
Бирок, 27-февралда жабыр тарткан кыздардын бири 26 жаштагы Талас облусунун тургуну экени тастыкталган. Ал өз учурунда укук коргоо органдарына "патриотторго" каршы арыз жазып, чара көрүүнү өтүнгөн.
Арыздануучу тараптын айтымында бейтааныш кыргыз жигиттер алардын ден соолугуна залакасын тийгизген эмес.
Окуя болгондон бир жума өткөндөн кийин Кыргызстандын ИИМинин Россиядагы өкүлчүлүгү тартип бузгандардын өздүгүн аныктаган.
Учурда ИИМдин Россиядагы өкүлчүлүгүнүн кызматкерлери тартип бузуучулар менен профилактикалык маек курду. Кармалгандардын бардыгы Москвадагы Марьино райондук полициясына өткөрүлүп берилди.
Мындай окуя кайталанбашы үчүн Марьино районунда ИИМдин кызматкерлери тарабынан рейд жүргүзүлүүдө.
