БИШКЕК, 1-мар. — Sputnik. Кремль федералдык телеканалдарга Москвада жаш баланы өлтүргөн аял тууралуу маалымат таратууга тыюу салбаганын Россиянын президентинин маалымат катчысы Дмитрий Песков билдирди.
Аял колуна наристенин кесилген башын көтөрүп, көчөдө 20 мүнөттөй жүргөн. Ал жолдо бараткандарды жана полицияны коркутканын күбөлөр айтууда. Федералдык миграция кызматынын шаардык башкармалыгынан билдиришкендей, өзбекстандык аял бала багуучу болуп мыйзамсыз иштеп жүргөн.
Песков бул окуяны чоң кайгы экенин айтат. Ошондой эле, тергөөнүн жыйынтыгын күтүп турууга жана журналисттерди улуттук негизге басым жасап, абалды ырбатбоого чакырды.
"Москва — бул өтө чоң мегаполис. Анда көп улуттун, диндин өкүлдөрү жашайт. Андыктан муну кайсы бир улутка шылтап жазууга болбойт. Бул чындыгында акылга сыйбаган чоң кайгы", — дейт ал.
Песков ошондой эле, Кремль бул маалыматты таратпоо боюнча тыюу салбаганын, ЖМКлар этикалык нерсени эске алып, өздөрү чечим кабыл алганын кошумчалады.
