БИШКЕК, 27-фев. — Sputnik. Албек Ибраимов шаардык кеңештин депутаттары ага добуш берүүдөн мурда, алардын алдында бир-эки ооз сөз айтты.
Бүгүн Бишкек шаардык кеңешинин депутаттары калаа башчысын шайлады. Албек Ибраимов бирден-бир жалгыз талапкер болгон. Ага 42 депутат "макул" деген добушун берсе, бирөө каршы болду.
"Мен Бишкек шаарында туулгам, бул менен өз шаарым. Өзүм, балдарым ушул жерде төрөлүп-өстүк. Апам 30 жыл иштеген, атам Ленин атындагы заводдо иштеп, депутаттыкка шайланган. Андыктан, Бишкек мага чоочун эмес", — деди ал.
Анын айтымында, мурдагы мэр Кубанычбек Кулматов шаардын өнүгүшү үчүн жакшы программа түзүп кетти жана муну улантуу керек.
"Чыгымдарды кайрадан карап чыгуу зарыл, кризис катуу кирип келсе, каражат керек болуп калат. Жолдорду оңдоп, автоунаалардын тыгындарын азайтып, шаарда жүрүүгө ыңгайлуу кылышыбыз керек. Бишкек шаар гана эмес, Кыргызстандын борбору катары ар тараптан, архитектурасы жана ландшафтык дизайны элди өзүнө тартып тургандай болушу зарыл",— деди Ибраимов.
Анын айтымында, сейил бактар менен эс алуучу аймактар көз жаздымда калбашы кажет.
