Көчмөндөр оюндарына карата Кырчын жайлоосундагы жолдорду оңдоо иштери башталды

БИШКЕК, 24-фев. — Sputnik. Экинчи Дүйнөлүк көчмөндөр оюндары өтүүчү Кырчын жайлоосундагы жолдорду оңдоо иштери башталганын Транспорт жана коммуникациялар министрлигинин өкүлү өкмөттүн жыйынында билдирди.

Бүгүн, 24-февраль күнү премьер-министр Темир Сариевдин жетекчилиги алдында өткөн жыйында Көчмөндөр оюндарына даярдык талкууланды. 

Жыйын жүрүшүндө өкмөт алдындагы Курулуш, архитектура, турак-жай жана коммуналдык чарба мамлекеттик агенттигинин директору Турдубек Мамбетов Ысык-Көл районундагы Бактуу-Долоноту айылындагы ат майдандын курулушу 15-августка чейин бүткөрүлө турганын айтты. 

Ал эми Транспорт жана коммуникациялар министрлигинин маалыматы боюнча Балыкчы — Тамчы — Корумду жолунун курулушу жүрүп, Кырчын жайлоосундагы жолдорду оңдоого даярдыктар башталууда. Аталган жолдор үстүбүздөгү жылдын 1-августуна чейин бүткөрүлүшү пландалууда.

Сариев Көчмөндөр оюнун уюштуруу жана өткөрүү боюнча бардык иштерди өз мөөнөтүндө жана сапаттуу бүткөрүү, анын алкагында жашылдандыруу иштерин активдүү жүргүзүү тапшырмасын берди.