БИШКЕК, 9-фев. — Sputnik. Бүгүн шаар мэри Кубанычбек Кулматов кызматынан кетип жатканы тууралуу маалымат тараган. Учурда анын арызы өкмөттө каралып жатканы белгилүү болду.
Мэрге жааган сын пикирлер
Акыркы эки жылда Бишкек шаарын жетектеп келген Кубанычбек Кулматов карапайым калк менен бирге өлкө башчысы Алмазбек Атамбаевден да бир нече ирет катуу сынга кабылган.
Мындан жарым жыл мурун президент борбор калаадагы таштанды маселеси оң жагына чечилбесе мэр кызматынан кетерин да айткан.
"Таштанды боюнча өтө көп арыз түшүп жатат. Бажы кызматын жетектеп турганда бир топ ийгиликтерди көрсөткөнсүз, бирок мэриянын багыты таптакыр башка. Бул жерде сиз коррупцияга малынган чиновниктер менен эмес, шаар тургундары менен иш алып барасыз", — деген өлкө башчы.
Мындан тышкары, социалдык тармак пайдалануучулары да бир топ сөөмөй кезеп, жолдогу аң-чөнөктөрдүн сүрөтүн Интернетке жайгаштырып келишкен. Айрым активисттер чуңкурларды "О" тамгасы катары пайдаланып, жазуу иретинде мэрге "ыраазычылык" билдиришкен.
Кулматовду шаардык кеңештин депутаттары да сынга алышкан. Негизинен эл өкүлдөрү шаар башчысын Бишкектин ички дүң продукциясынын өсүүсү 4,5 пайызга төмөндөп кеткени үчүн күнөөлөшкөн.
Мэрге шаардык кызматтар өз милдетин аткарбай жатат деген кине менен расмий кат жазып белгилүү юрист Валерий Плужник да кайрылган. Анда юрист кар жааган маалда шаардын борбордук аймактары тазаланбай жатканын жүйө келтирген.
Ал эми 2014-жылы борбордук аянтка коюлган жаңы жылдык балаты шаардыктардын көбүн нааразы кылган.
"Башкы балатыны картон оюнчуктардан башка жасалга менен кооздосо болбойбу", — деп жазышкан соцтармактардын пайдалануучулары.
Алкоого алынган аракеттер
Бирок акыркы жарым жыл ичинде Кулматовду "ортого" алган сын көз караштар азыраак болду. Көптөрдүн мактоосуна арзып келе жаткан мэрди биринчилерден болуп президент Атамбаев байкап, анын "таштанды менен күрөшүүдөгү гениалдуу чечимине" ыраазы болгон.
"25 жылдан бери жолун таппай келе жаткан маселени чечип койду. Эми киреше алуу максатында ишканалар таштанды үчүн бири-бири менен атаандаша тургандай жол тапты", — деген анда өлкө башчы.
Өткөн жылдын жай айларында Бишкек шаарында болгон катуу шамал учурунда мэрдин шаар кызматтары менен бирге борбор калааны жеке өзүнүн кыдырып жүргөнү шаардыктардын алкоосуна арзыган.
Ал эми 2015-жылдын соңунан баштап борбордук аянтка орнотулган жаңы жылдык балаты, анын жасалгасы жана аянт менен филармониянын жарыктандырылышы шаар тургундарынын көңүлүн биротоло эритип салгандай болду.
