БИШКЕК, 1-сен. — Sputnik. Президент Алмазбек Атамбаев Бишкек шаары үч айдын аралыгында таштандыдан арылбаса, мэр Кубанычбек Кулматов колунан келе турган иш издеши керектигин №1 гимназия-интернаты менен таанышуу учурунда билдирди.
Анын айтымында, шаар башчысы мэрдин милдетин өз деңгээлинде аткара албай жатат. Өлкө башчы Кулматовго таштанды маселесин жыл аягына чейин чечүүгө тапшырма берди.
"Таштанды боюнча өтө көп арыз түшүп жатат. Бажы кызматын жетектеп турганда бир топ ийгиликтерди көрсөткөнсүз, бирок мэриянын багыты таптакыр башка. Бул жерде сиз коррупцияга малынган чиновниктер менен эмес, шаар тургундары менен иш алып барасыз", — деди Атамбаев.
Президент эгер мэр жыл соңуна чейин тийиштүү маселелер чечилбесе, башка жумуш издей берсе боло турганын кошумчалады.
