БИШКЕК, 9-фев. — Sputnik. Кийинки 2017-жылы залкар манасчы Сагымбай Орозбаковдун 150 жылдыгы белгилене турганын "Саякбай манасчы" коомдук фондусу билдирди.
Фонддун мүчөсү Улан Исмаиловдун айтымында, демилгеленип жаткан иш-чара Маданият, маалымат жана туризм министрлигине сунушталат.
"Мааракенин алкагында Сагымбай манасчынын варианты боюнча манасчылардын кароо-сынагын өткөрүп, буга чейин чыккан эпосту көбөйтүп чыгарууну пландаштырып жатабыз. Мындан тышкары, манасчылардын таймашын өткөрүү каралууда", — дейт манасчы.
Болочок манасчы улуу дастанды айтууга көлдө жүргөн кезинен баштап ынтызарланат. Ал эми эл алдына Чүйгө көчүп келгенден кийин чыга баштайт. Өзүнүн Манас айтып калуусун Сагымбай Орозбаков аян түштөрү менен байланыштырган. Андан жазылып алынган тексттер "Манас" эпосунун окуяларынын баштан аяк толук жана кеңири баяндаган илимге белгилүү биринчи фактысы болуп саналат. Жазылып алынган тексттердин көлөмү 180 миң 378 сап ырды түзөт.
Улуу манасчы 1930-жылы оорудан каза болуп, сөөгү Кочкорго коюлган.
