БИШКЕК, 4-фев. — Sputnik. Бишкекте ири соода түйүндөрүнүн биринде Мамлекеттик миграция кызматы "Элден элге" фондусу менен биргеликте Памир кыргыздарына жардам берүү үчүн кайрымдуулук акциясын өткөрдү.
Кайрымдуулук акциясынын уюштуруучуларынын бири Замир Айылчиевдин айтымында, иш-чара Памир кыргыздарына материалдык жана моралдык жардам көрсөтүү максатын көздөйт.
"Афганистандын аймагында жашаган этникалык кыргыздар өтө оор шартта күн көрүшөт. Андыктан аларга кышкы кийим-кече, тамак-аш жактан жардам берип, маданий жактан да көп саамалык тартуулоону максат кылып жатабыз. Акциядан чогулган каражат Миграция кызматына берилип, атайын түзүлгөн комиссиянын көзөмөлү менен муктаждыкка жумшалат", — деди ал.
Буга чейин Памир кыргыздарына үч ирет экспедиция уюштурулуп, гуманитардык жардам берилип келген.
2014-жылдан тарта иштей баштаган Кыргызстандын Афганистандагы элчилигинин жардамы менен памир кыргыздарынын 80 пайызы афган паспортуна ээ болгон.
Учурда Памирде 1400 этникалык кыргыз жашайт.
