БИШКЕК, 28-янв. — Sputnik. Жалал-Абад облусунун Токтогул районунда көп кабаттуу үйлөрдүн жалпы ажатканасынын ичинен жаңы төрөлгөн наристени чыгарып алышты. Бул тууралуу Өзгөчө кырдаалдар министрлигинен билдиришти.
Окуя кечээ саат 21:47 чамаларында болгон. Ажатканадагы баланы Токтогул көчөсүндөгү көп кабаттуу үйдүн жашоочусу, 1994-жылы туулган Майрам Эргешова көрүп калган. Ал тез арада 112 кызматынын телефон байланышы аркылуу билдирген.
Ыкчам иликтөө иштеринин негизинде наристенин энеси табылганы маалыматта белгиленет.
Кыргызстандын Өзгөчө кырдаалдар министри Кубатбек Боронов адам өмүрүнө кайдыгер карабай, куткаруучуларга маалымат бергендиги үчүн Эргешованы жана наристени тирүү алып чыккан куткаруучулар ӨКМдин мекемелик сыйлыктары менен сыйланаарын билдирди.
