БИШКЕК, 26-янв. — Sputnik. Кореялык адистер кыргызстандык балдарга акысыз операция жасай турганын өлкөнүн Кызыл жарым ай коому билдирди.
Маалыматка ылайык, дарыгерлер буга чейин операция болгон балдарды дагы бир ирет текшерүүдөн өткөрмөкчү. Андан соң 33 баланын ден соолугун текшерип, анын ичинен 12 наристени операция жасоо үчүн тандап алышат.
12 баланын алтоо быйыл, калганы 2017-жылы операция болот.
Кызыл жарым ай коому Кыргызстандын Баткен, Жалал-Абад, Ош, Талас жана Ысык-Көл облустарында жашаган аз камсыз үй-бүлөлөрдүн операцияга муктаж 13 баланын маалыматын берген. Дагы 20 баланын тизмесин Саламаттык сактоо министрлиги сунуштаган.
Былтыр июль айында Түштүк Кореянын ооруканаларында операция жасатуу үчүн ар аймактан беш бала жөнөтүлгөн. 2010-жылдан тарта 26 тубаса жүрөк оорулуу балага аталган өлкөдө операция жасалган.
Балдардын дарылануусу, жашоо жана башка чыгымдары ар бир наристе үчүн болжол менен 30 миң долларды түзөт. Бардык каражат Түштүк Корея тарабынан төлөнмөкчү.
