БИШКЕК, 25-янв. — Sputnik. Иракта терроризмге каршы күрөш чет элдик мамлекеттердин кийлигишүүсүз жүрө турганын өлкөнүн тышкы иштер министри Ибрагим аль-Джаафари журналисттерге билдирди.
Маалыматка ылайык, министр Бахрейндин борбору Манама шаарында өтүп жаткан Биринчи араб-индиялык форумга катышууда.
"Ирактагы терроризмге каршы күрөш өлкөнүн өзүнүн күчү менен гана жүрөт. Айрым кеңешчилердин гана жардамы алынышы мүмкүн", — деди министр.
Ал Ирак эгемендүү мамлекет экенин, муну бузууга өлкө эч кимге жол бербей турганын белгиледи. Аль-Джаафари мамлекеттин аймагындагы "Ислам мамлекети" террористтик тобу быйыл тыптыйпыл жок болоруна ишеним артты.
Ага чейин АКШ президенти Барак Обама Сирия жана Ирак мамлекеттериндеги ИМ менен күрөшүү үчүн ири масштабдуу операцияларга каршы экенин билдирген. Бирок Америка аталган аймакта өзүнүн аскердик күчтөрүн жайгаштыруусун улантып, инструктор менен кеңешчилерден тышкары атайы дайындоодогу бөлүктөрдү жиберип келет.
